Ebembe ya Thomson (búku)
Ebembe ya Thomson ezalí lisoló na lingála ya Espérance-François Ngayibata Bulayumi.
Ndeko! Áwa y'ozalí kosimba búku eye, esengeli koyeba ete, mokolo mua lɛlo okolía tǒ osi oliaki thomson awa na Kinshásá. Soki yɔ̌ oliaki yango tɛ, kanisa ete moko ya bandeko ba yɔ̌ ya libota nde aliaki tǒ mpé akolía yangó. Na yangó nazalí kosenga yɔ̌, oluka komeka kokanisa likolo y'ebembe ya thomson; eye etikalaka ntango molayi kati na bandako ya malíli áwa na Kinshásá. Tála! Ebele ya mbisi o kati ya mayi ma Kongó bakundamaka lisúsu tɛ́ o «malita» ndenge esengemi, zambi Thomson nde ekanga mabumu ya bana ba Kinshásá lokola kaka lilita na yé moko.
Ndenge moto aliaka, se bongo mpé akúfaka mpé akundamaka. Kosálisa mbísi y'ebalé mpô yé mpé aya kozua esika ya lilita kati na libumu ya bato, ezalí koluka kosalisa nde bato; mpô ete bibembe bya bango bivandaka ntango molai tɛ́, kuna kati na ndako ya malili, na ndenge esalami mpona ebembe ya thomson.
Ata kutu oleyi na yɔ̌ thomson te na mokolo mua lɛlo, tǒ mpé ndeko wa yɔ̌ aleyi na yé yangó tɛ́! Okanisaka níni likolo ya sima na dindon, tǒ mpé biteni bya soso ya bandako ya malili? Eee, ndeko! Okoki koloba ete yɔ̌ awa na kati ya Kinshásá na ntango ya milulu tǒ mpé matanga ovanda nainu na kiti ya plastik tɛ́?
Sima ya dindon, biteni bya soso ya bandako ya malíli mpé kiti ya plastik, ezalí kati na mibombamo mya nzéla eye, ebembe ya thomson ememi bísó. Silisa kotanga búku eye. Pesa yango moninga wa yɔ̌, mpô yé mpé akoka kotanga lisapo y'ebembe ya Thomson Mpiodi.
Búku kokoma
(ln) Espérance-François Ngayibata Bulayumi: Ebembe ya Thomson. Viɛnɛ (Otrish), 2011: Bobimisi Kiamvu. ISBN 978-3-200-02141-9, 136 lokásá.